"Məqsəd mövsümü mükafatçılar sırasında başa vurmaqdır"
Futzal üzrə “Neftçi” İK-nın baş məşqçisi Hacıbala Abdullazadə yeni mövsümün ilk oyununa hazırlıq barədə açıqlama verib.
Mediasport.az xəbər verir ki, federasiyanın rəsmi saytına danışan mütəxəssis komandadanın vəziyyəti ilə bağlı fikirlərini də bölüşüb:
“Demək olar, keçənilki heyətimizi qorumuşuq. Gənclərin hesabına heyətimizi bir qədər də genişləndirdik. 19 yaşadək futzalçılardan ibarət Azərbaycan millisində çıxış etmiş, hazırda isə yaşla əlaqədar bu komandada oynamayan oyunçulara şans verəcəyik. Əlbəttə, istəyimiz həm də milli komanda üçün yeni futzalçı nəsli yetişdirməkdir. Bir iranlı legionerimiz də var. Təəssüf ki, 2 gün əvvəl məşq prosesində zədələndi. Ondan başqa, millinin üzvü Amir Şocaei də komandamızdadır. İşlər gedir, sabah bizi gərgin matç gözləyir. Ötən mövsüm çempionatda biz onları qabaqlamışdıqsa, kubokun finalında “Baku Fire” güclü oldu. Məqsədimiz yeni mövsümü mükafatçılar sırasında başa vurmaqdır”.
Qeyd edək ki, yüksək Liqada mövsümə sabah start veriləcək. “Neftçi” İK “Baku Fire” ilə qarşılaşacaq. Bakı İdman Sarayında keçiriləcək görüş saat 14:00-da başlanacaq.
