Milli komandamızın üzvü: "Sözlə heç nə həll olunmur"
Futzal üzrə milli komandamızın üzvü Tyaqo Bolinya gələn il keçiriləcək futzal üzrə dünya çempionatının elit-raundunun dünən atılan püşkünü dəyərləndirib.
mediasport.az xəbər verir ki, yığmamızın üzvü Qazaxıstan, Rumıniya və Niderland yığmaları ilə eyni qrupda yarışacaq millimizin potensialı barədə danışıb, komandamızın şanslarını dəyərləndirib.
Bolinya komandanın işinin çətin olacağını vurğulayıb:
- Ancaq yaxşı şansımızın olduğunu da deyə bilərəm. Nisbətən Qazaxıstan millisi favorit hesab olunur. Onları son illərdə daha yaxşı çıxış etdiklərini nəzərə almaq lazımdır. Rumıniya millisi ilə qarşılaşmasaq da, klub səviyyəsində "Araz-Naxçıvan"ın heyətində onların çempionu olmuş “Deva” ilə üz-üzə gəlmişdik. Məğlub olduğumuz qarşılaşma çox çətin keçmişdi. Niderland isə 1 il əvvəl Avropa çempionatına ev sahibliyi etməklə yanaşı, iştirak etmək hüququ da qazanmışdı. Güclü rəqibdir. Ancaq indiyəqədərki nəticələrə, iştirak etdikləri turnirlərə diqqət yetirsək, Qazaxıstan qədər deyillər.
Biz də yaxşı oynayırıq, qatıldığımız yarışlarda favorit hesab olunuruq. Təbii ki, sözlə heç nə həll olunmur. İddian böyükdürsə və ona çatmaq istəyirsənsə, yaxşı hazırlaşmalısan, bir neçə toplanış keçirməlisən, yoldaşlıq oyunlarında gücünü sınamalısan və rəsmi oyunlara qədər hansı çatışmazlıqların varsa, onları qaydasına salmalısan. Komandamızın əksər üzvü başqa klublarda, çempionatlarda çıxış edir, fərqli üslubda oynayırlar. Bir yerdə daha çox məşq etməliyik ki, baş məşqçinin verdiyi tapşırıqları yerinə yetirək, istədiyini özünə qaytaraq. Yenə deyirəm, nəticəmiz yaxşı ola bilər. Çünki komanda yoldaşlarıma güvənirəm.
Vacib olan evdə keçirəcəyimiz hər 3 oyunda qələbə qazanmaq, səfər matçlarında isə mümkün qədər çox xal toplamaqdır.
