Vüqar Həşimov adına "fair play" mükafatının qalibi məlum olub
Azərbaycanın görkəmli şahmatçısı, Avropa çempionu Vüqar Həşimovun adına təsis edilən "fair play" mükafatının 2024-cü il üzrə sahibləri müəyyənləşib.
Mediasport.az xəbər verir ki, Niderlandın Veyk-an-Zee şəhərində baş tutan "Tata Steel Chess" turnirində iştirak edən şahmatçıların "fair play" prinsipləri nəzərə alınmaqla qaliblər açıqlanıb.
Vüqar Həşimov Şahmat Fondunun təsis etdiyi mükafata əsas yarışda mübarizə aparan niderlandlı Maks Varmerdam və "Challenge"in iştirakçısı belçikalı Stefan Beukema layiq görülüb. Mükafatları şahmatçılara yarışın direktoru Yerun Van Den Berq təqdim edib. Hər iki şahmatçı bu mükafata ilk dəfə yiyələnib.
Xatırladaq ki, "Vugar Gashimov Fair Play Award" 2016-cı ildən təqdim olunur. Müxtəlif illərdə bu mükafata Maqnus Karlsen, Vişvanatan Anand, Vladimir Kramnik və digərləri sahib çıxıblar.
