İstanbulda dünya çempionu olan idmançımız güləş tariximizə düşdü
Sərbəst güləş üzrə Azərbaycan millisinin üzvü Yusif Dursunov Türkiyənin İstanbul şəhərində keçirilən 17 yaşadək güləşçilər arasında dünya çempionatının qalibi olub.
mediasport.az xəbər verir ki, idmançımız 110 kq çəki dərəcəsində fəxri kürsünün ən yüksək pilləsinə qalxıb.
O, müvafiq olaraq özbəkistanlı Eldorbek Xasanov (11:0), gürcüstanlı Aleksandr Abramişvili (4:1), ermənistanlı Henrik Haykyan (6:2) və qazaxıstanlı Yedige Kassimbeki (4:2) məğlub edərək, dünya çempionu tituluna yiyələnib.
Qeyd edək ki, Yusif Dursunov iyunda Albaniyanın paytaxtı Tiranada Avropa çempionatının qalibi olub.
Gənc pəhləvanımız beləliklə adını Azərbaycan güləş tarixinə yazdırmış oldu. Ağstafa güləş məktəbinin yetirməsi ən ağır çəkidə yeniyetmələr arasında dünya çempionu olan ilk güləşçimiz ünvanına sahib çıxdı.
