Azərbaycan Milli Paralimpiya Komitəsinin prezidenti müəyyənləşdi
Azərbaycan Milli Paralimpiya Komitəsinin Növbədənkənar Ümumi Yığıncağı keçirilib.
MediaSport.az xəbər verir ki, tədbirdə Gənclər və idman naziri Fərid Qayıbov, Beynəlxalq Görmə Məhdudiyyətli İdmançılar Assosiasiyasının (IBSA) prezidenti İlqar Rəhimov, Əmək və əhalinin sosial müdafiəsi nazirinin müavini Hidayət Abdullayev və komitənin üzvləri iştirak ediblər.
Növbədənkənar Ümumi Yığıncaqda 2022-ci il ərzində görülən işlər barədə hesabat, İlqar Rəhimovun Beynəlxalq Görmə Məhdudiyyətli İdmançılar Assosiasiyasının prezidenti seçilməsi ilə əlaqədar Milli Paralimpiya Komitəsi prezidentliyindən öz arzusu ilə istefası, eləcə də Komitənin nizamnaməsinə dəyişikliyin edilməsi və rəhbər orqanının formalaşdırılması kimi məsələlərə baxılıb.
Gənclər və idman naziri Fərid Qayıbov ölkədə idmanın inkişafı sahəsində görülən işlərə diqqət çəkib. Nazir Komitənin sabiq prezidenti İlqar Rəhimova gələcək fəaliyyətində uğurlar arzu edib.
Gündəliyə uyğun olaraq Azərbaycan Milli Paralimpiya Komitəsinin yeni Prezidentinin, Vitse-Prezidentlərinin və İdarə Heyətinin üzvləri seçilib.
Səsvermənin nəticəsinə əsasən Hidayət Abdullayev komitənin yeni prezidenti, İlham Zəkiyev və Fuad Hacıyev vitse-prezidentlər, Jalə Əhmədova və Ramilə Mahmudova isə İdarə Heyətinin üzvləri seçiliblər.
H.Abdullayev göstərilən etimada görə minnətdarlığını bildirib.
