"Qızıl top"un qalibi və ilin ən yaxşı futbolçuları müəyyənləşdi - FOTO
“France Football” nəşrinin ilin ən yaxşı futbolçusu üçün təsis etdiyi “Qızıl top” mükafatının qalibi məlum olub.
Mediasport.az xəbər verir ki, "Mançester Siti"nin yarımmüdafiəçisi Rodri ilin futbolçusu seçilib.
İspan futbolçu Madrid "Real"ından ən yaxın izləyiciləri - Vinisius Junior və Cud Bellingemi qabaqlayıb.
Fransanın paytaxtı Parisdəki Şatle teatrında keçirilən mərasimdə ilin ən gənc futbolçusu "Barselona"dan Lamin Yamal, ən yaxşı qadın futbolçusu adına "Barselona"dan Aytana Bonmati layiq görülüb.
Qadın futbolunda "Barselona" (İspaniya), kişilərdə "Real" (İspaniya) ilin ən yaxşı klubları kimi mükafatlandırılıb.
"Real" klubu tədbiri boykot etdiyi üçün iştirak etməyib.
"Aston Villa" və Argentina millisinin qapıçısı Emiliano Martines ilin ən yaxşı qapıçısına təqdim edilən Lev Yaşin mükafatının qalibi olub.
İlin ən yaxşı məşqçisi kimi "Real"da çalışan Karlo Ançelotti Yohan Kroyf mükafatı ilə təltif edilib.
Qadınlar arasında ilin ən yaxşı məşqçisi "Çelsi"nin çalışdırıcısı Emma Heyz olub.
2023/24 mövsümünün nəticələrinə əsasən, Harri Keyn ("Bayern", 45 oyuna 44 qol) və Kilian Mbappe (PSJ / "Real", 48 oyuna 44 qol) Herd Müller mükafatını əldə ediblər.
