"Sumqayıt" futbol və basketbol klublarını bir-birinə nə bağlayır?
2023/2024-cü illər mövsümündə basketbol üzrə Azərbaycan çempionatında iştirak edəcək 10 komandadan 2-si yeni yaradılıb. Bunlar "Xəzri" və "Sumqayıt" klublarıdır.
Mediasport.az xəbər verir ki, "Sumqayıt" basketbol klubunun loqosunun "Sumqayıt" futbol klubunun loqosu ilə tam eynilik təşkil etməsi bəzi suallara yol açıb.
Məlumatlar paylaşılır ki, basketbol klubu loqonu oğurlayıb və "Sumqayıt" FK-nın bundan xəbəri yoxdur.
Suallarımızı "Sumqayıt" futbol klubunun mətbuat katibi Zaur Xudiyev cavablandırıb. Klub rəsmisi deyib ki, burada hər hansı oğurluqdan, plagiatdan söhbət getmir:
"Sumqayıt" basketbol klubunun ad və loqosunun bizim klubumuzla eyni olması normaldır. Eyni şəhəri fərqli idman növündə təmsil edən klublardır. Onların bizim loqo və adımızdan istifadə etməyində bir problem görmürük. Bu klubun yaradılmasında "Sumqayıt" futbol klubu olaraq, biz təşkilati məsələlərdə müəyyən tövsiyə xarakterli məsləhətlər vermişik. Amma ad-loqo eyni olsa da, müəyyən proseslərdə biz onlara dəstək versək də, klubun ayrıca rəhbərliyi, idarəetmə strukturu və ayrı maliyyə dayaqları olacaq".
Qeyd edək ki, "Sumqayıt" basketbol klubunun direktoru İsmayıl Əfəndiyev olacaq.
