Azərbaycan Avropa çempionu oldu!
Yeniyetmə cüdoçulardan ibarət Azərbaycan millisi Portuqaliyanın Odivelas şəhərində keçirilən Avropa çempionatında möhtəşəm çıxış edərək çempion adını qazanıb.
MediaSport.az xəbər verir ki, qarışıq komanda yarışında müvafiq olaraq Niderland, Almaniya və İtaliyaya qalib gələn yığma finalda Fransanı da məğlub edib.
Komandamız gərgin mübarizə şəraitində keçən qarşılaşmaların startında 1:3 hesabı ilə geri düşməsinə baxmayaraq, əzmkarlıq nümayiş etdirərək,ümumi hesabı bərabərləşdirib - 3:3.
Yarışın qalibini qızıl xal müəyyənləşdirib. Lakin fransalı Adrian Mivovan 60 kq çəki dərəcəsində Məhəmməd Musayevin önünə çıxmayıb və Azərbaycan millisi 4:3 hesablı qələbə ilə Avropa çempionu olub.
Qeyd edək ki, Avropa çempionatının fərdi yarışlarını 6 qızıl, 3 bürünc olmaqla, ümumilikdə 9 medalla başa vuran yığmamız komanda hesabında da birinci yeri tutub.
