"Neftçi" Dünya Qadınlar Seriyasında Melilya mərhələsinin qalibi oldu
!["Neftçi" Dünya Qadınlar Seriyasında Melilya mərhələsinin qalibi oldu](https://mediasport.az/uploads/images/202308/image_750x_64e1ee1bb50db.jpg)
“Neftçi” İspaniyada təşkil olunan 3x3 basketbolu üzrə Dünya Qadınlar Seriyasının Melilya mərhələsinin çempionu olub.
mediasport.az xəbər verir ki, Azərbaycan klubu finalda İspaniya millisini məğlub edib.
Gərgin duelin yekununda rəqibini 13:12 hesabı ilə üstələyən “Neftçi” Melilya mərhələsini qazanıb. “Ağ-qaralar”ın üzvü Bryana Freyzer yarışın ən dəyərli oyuncusu (MVP) mükafatına layiq görülüb.
Qeyd edək ki, Dünya Qadın Seriyasında Azərbaycanın 3x3 qadın millisi və “Neftçi” klubu növbəti oyunlarını avqustun 22-də Bakıda keçirəcəklər.
Təmsilçilərimizin oyun təqvimləri də müəyyənləşib. Yarış avqustun 22-23-də 16 komandanın iştirakı ilə təşkil olunacaq.
D qrupunda qərarlaşmış yığmamız Litva və Almaniya ilə mübarizə aparacaq. İlk oyun avqustun 22-də, saat 18:15 -də Litva seçməsinə qarşı baş tutacaq.
“Neftçi” isə C qrupunda "Yuanda" (Çin) və təsnifat mərhələsi qrupundan lider kimi əsas qruplara yüksəlməyə çalışacaq üç millidən (İtaliya, Malayziya və Tayland) biri ilə gücünü sınayacaq. Bakı klubu ilk oyununu saat 17:50 -də məhz bu yığmalardan birinə qarşı keçirəcək.
Qruplarda ilk iki yeri tutacaq komandalar 1/4 finala vəsiqə qazanacaqlar. Bakı mərhələsinin oyunları dənizkənarı bulvarda yerləşən saat qülləsinin yanında keçiriləcək.