Sofiyada TARİXİ GÜN: Dadaş Dadaşbəyli 3 qızıl medalla Avropa çempionu oldu!
Azərbaycan ağırlıqqaldıranı Dadaş Dadaşbəyli Avropa çempionatında tarixi uğura imza atıb.
Mediasport.az xəbər verir ki, idmançımız Bolqarıstanın paytaxtı Sofiyada keçirilən qitə birinciliyində 3 qızıl medal qazanıb.
Millimizin lideri Avropa çempionu titulunu 109 kq çəki dərəcəsində əldə edib.
Dadaşbəyli birdənqaldırma hərəkətində 176 kq-ın öhdəsindən gəlib və bu hərəkətdə Avropa çempionatının qalibi olub.
Atletimiz təkanlaqaldırma hərəkətində də eyni uğuru təkrarlayıb. O, 212 kq-ı başı üzərinə qaldıraraq bu hərəkətdə də qızıl medal qazanıb.
Toplam 388 kq (176+212) nəticə ilə yekun sıralamada da Avropada hər kəsi qabaqlayaraq fəxri kürsünün ən yüksək pilləsinə qalxıb.
Kişilər arasında bu uğura sonuncu dəfə 2012-ci ildə Türkiyənin Antalya şəhərində keçirilən Avropa çempionatında Əfqan Bayramov imza atmışdı.
