"Rahidə dedim ki, sənin bizim skamyaya dönüb nəsə deməyin düzgün deyil" - VİDEO

Premyer Liqada medallar uğrunda yarışan "Zirə" 14-cü turu "Səbail" üzərində qələbə ilə başa vurdu.

mediasport.az xəbər verir ki, qəsəbə təmsilçisinin baş məşqçisi Rəşad Sadıqov 1:0 hesablı qələbəni şərh edib, jurnalistlərin suallarını cavablandırıb:

- Oyun gözlədiyimizdən də çətin, gərgin keçdi. Birinci hissədə topla oyunumuz daha yaxşı alınırdı. Yaxşı hücumlarımız var idi, amma sonluğu gətirə bilmirdik. İkinci hissəyə rəqib daha aqressiv başladı. Dəqiqələr ötdükcə xüsusilə də sağ cinahdan yüklənirdik. Lorislə Qismət yaxşı anlaşırdılar. Qol da oradan gəldi. Çox vacib qələbə qazandıq. Həftə ərzində futbolçuların üzərində təzyiq var idi. Buna baxmayaraq, önəmli qalibiyyət əldə etdik. İki həftəlik fasilə var. Sonra kubok matçı, sonra "Qarabağ"la oyunumuz olacaq. İki gün dincəlib matçlara hazırlaşacağıq. 

Heyətdə itkilər var. Bu, oyununuza təsir etdi?

- İlk hissədə çətinliyimiz yox idi. Amma ikinci hissənin əvvəlində oldu. Hücumameyilli oyunçularımız hücumları tam istədiyim kimi yekunlaşdıra bilmirdilər. Amma oyun quruculuğu çox yaxşı idi. Rüstəmi heç nədən itirdik. 4 gündür qızdırma içindədir. Felipe "Qəbələ" ilə görüşə sağlam çıxdı, bir saat sonra ayağı şişməyə başladı. İkinci hissədə oyunu gücləndirmək istəyəndə itkilər özünü daha qabarıq şəkildə göstərdi. Amma meydana çıxan, sonradan daxil olanlar sona kimi əllərindən gələni etdilər. 

Hakimliklə bağlı fikirləriniz necədir? Oyun zamanı etiraz edirdiz, Rahid Əmirquliyevlə də aranızda insident oldu. Nə baş vermişdi?

- Rahid birinci bizə etiraz etdi. Mən də dedim ki, sənin bizim skamyaya dönüb nəsə deməyin düzgün deyil. Rahidlə 15-20 ilin dostuyuq. Başqa bir şey ola bilməz. Etiraza gəldikdə, müzakirə edirik də. O da etiraz sayılır? 4-cü hakimlə arada dialoq edirdik.

"Qarabağ"la matçdan öncə xüsusi psixoloji hazırlığa ehtiyac duyulur?

- Hər rəqib "Qarabağ"la oyuna öncə psixoloji cəhətdən hazır olmalıdır. Bu, tək bizim daxili çempionata aid deyil. Beynəlxalq arenada da görürük ki, rəqiblər "Qarabağ"la matça xüsusi hazırlaşırlar. Amma öncə kubokda çox vacib 1/8 final görüşü olacaq. 

Zədəli futbolçuların durumu nə yerdədir?

- Ciddi deyil, amma bu periodda 2-3 həftə məşqləri qaçırıb sonra yenidən hazır olmaqları vaxt alacaq. Kubokda 1/8 finaldan sonra 4-5 gündən bir oyunlar bizi gözləyir. Həmin mərhələdə geniş heyətə ehtiyacım olacaq. Hər futbolçunun sağlamlığı bizim üçün önəmlidir. 

Bu gün rəqib "Qarabağ" və ya "Neftçi" olsaydı, qapıda yenə Mehdi Cənnətovu görəcəkdik?

- Bəli. Yenə qapıda Mehdini görəcəkdik. "Qəbələ" ilə oyunda bir az taktiki səhv idi. Keçən dəfə də bildirdim ki, bu, daha çox Ülvinin ustalığı idi. Bəlkə də çempionatımızda 10 ildə bir baş verəcək hadisədir. O da bizim başımıza gəldi. "Qəbələ" ilə oyunu çox yaxşı keçirmişdi.

Bundan sonra "Zirə"nin 3-4-cü yerlər uğrunda mübarizə aparacağını demək olar?

- Bu gün elə görünür. Amma futboldur. "Sabah"ın 13 tura topladığı xal son 13 ildə çempionluq xalıdır. Ötən illərə boylansaq, nə "Qarabağ", nə "Neftçi" 13 turdan sonra bu qədər xal toplayıb. "Sabah"la "Qarabağ" çox ambisiyalıdır. "Neftçi"də hansı vəziyyətdə olursa-olsun, hər zaman çempionatda favoritdir. Bu üçlük səviyyəcə digər komandalardan fərqlənir. Futboldur, sona kimi mübarizə aparacağıq. Hazırda bizim üçün 4-cü yer çox önəmlidir. Geridə olan komandalardan biri kuboku qazanmasa, 4-cü yer də Konfrans Liqasına vəsiqə verir. Hər şeyi düzgün təhlil etməyə çalışırıq. Bizim üçün ilk məqsəd Konfrans Liqasına vəsiqə qazanmaqdır. Təbii ki, medal da olsa, bu, əlavə qazancdır. Hələ qarşıda çox oyunlar var. Qış fasiləsini komandaların necə keçirəcəyi çox önəmlidir. Çempionatın nəticəsinə təsir edəcək amillər olacaq.

"Qarabağ" bu tur "Sabah"ı məğlub etsə, çempionluğun taleyi həll oluna bilər?

- Rəsmiləşmək yox, amma böyük üstünlük yarana bilər. Mən özüm bir azarkeş kimi səbrsizliklə bu oyunu gözləyirəm. Hər iki komanda möhtəşəm performans göstərir. Bu komandalar çempionatımıza rəng qatır. "Neftçi"ni də bu mübarizədən silməyə tələsmək olmaz. "Ağ-qaralar" şəxsən mənim çox xoşuma gəlir. Məncə, bu üç komanda arasında sona qədər gərgin mübarizə gedəcək.

 "Sabah" - "Qarabağ" oyununda hansı komandaya azarkeşlik edəcəksiz?

- Gözəl futbola.