Rövnəq Abdullayev Vadim Vasilyevlə bağlı tapşırıq verib
![Rövnəq Abdullayev Vadim Vasilyevlə bağlı tapşırıq verib](https://mediasport.az/uploads/images/202402/image_750x_65cde18c61ed1.jpg)
"Vadim Vasilyev AFFA prezidenti Rövnəq Abdullayevin tapşırığı ilə özəl klinikaya yerləşdirilib. Onun bütün müalicə xərcləri federasiya tərəfindən qarşılanır. Müalicə prosesini daim diqqətdə saxlayırıq".
Bu sözləri Mediasport.az saytına açıqlamasında AFFA-nın Mətbuat xidmətinin rəhbəri Elnur Məmmədli deyib.
Qurum rəsmisi ötən həftə insult keçirən Azərbaycan milli komandasının keçmiş futbolçusunun səhhəti ilə bağlı son məlumatı verib:
"Həkimlər onun vəziyyətini orta-stabil qiymətləndirirlər. Sevindirici haldır ki, həyati təhlükəsi yoxdur. Bir müddət reanimasayada müalicəsini davam etdirməlidir. Çünki təzyiqi sabit deyil. Təzyiqi stabilləşəndən sonra palataya köçürüləcək".
Yığmamızın heyətində 1999-2003-cü illərdə 33 oyuna 2 qol vurmuş sabiq forvardın müalicəsi AFFA tərəfindən qarşılanır.
O, karyerası ərzində “Xəzri”, “Bakı Fəhləsi”, “Medita” (Ukrayna), “Metallurq” (Ukrayna), “Neftçi”, "Tavriya" (Ukrayna), “Qarabağ”, “Bakı”, “Olimpik” və “Karvan” komandalarının formasını geyinib.