Boks yığma komandamız 20 il əvvəlki rekordunu Budvada yenilədi
Gənc boksçulardan ibarət Azərbaycan milli komandası tarixi uğura imza atıb.
Mediasport.az xəbər verir ki, yığmamız Monteneqronun Budva şəhərində keçirilən dünya çempionatında fərqlənib.
Baş məşqçi Elbrus Rzayevin rəhbərlik etdiyi millimizin 5 boksçusu mundialın yarımfinalına yüksəlib.
Bilalhəbaşi Nəzərov (48 kq), Zidan Hümbətov (51 kq), Məhəmmədəli Qasımzadə (60 kq), Əli Abdullayev (63,5 kq) və Aynur Mikayılova (57 kq) 1/4 final görüşlərini qələbə ilə başa vurmaqla, minimum 5 bürünc medalı təmin ediblər.
Bu nəticə Azərbaycan boks tarixində yeni rekorddur. Millimiz indiyədək gənclərin dünya birinciliyində heç vaxt bu qədər mükafat qazanmayıb.
Əvvəlki rekord 2004-cü ildə qeydə alınıb. 20 il əvvəl 4 boksçumuz yarımfinala adlayıb.
Cənubi Koreyanın Jeju şəhərində baş tutan mundialda boksçularımızın qazancı 4 bürünc mükafat olub.
Aynur Mikayılova isə mundialda medal qazanacaq ilk azərbaycanlı qız boksçu olacaq. Bunadək heç bir idmançımız bunu bacarmayıb.
