"Formula 1": Azərbaycan Qran-prisinin bilet satışında rekord
"Formula 1" üzrə 2023-cü il Azərbaycan Qran-prisinə bilet satışının ilkin nəticələri açıqlanıb.
mediasport.az saytı xəbər verir ki, ötən illərlə müqayisədə, rekord rəqəmlər qeydə alınıb.
Bilet satışına dekabrın 15-də start verilib və sutka ərzində son mövsümlə müqayisədə, iki dəfə artıq bilet alınıb. Bu, son 6 mövsümün rekord göstəricisidir.
Bakıda 7-ci dəfə keçiriləcək mötəbər idman tədbirinə ilk biletlərin sahibi Böyük Britaniya vətəndaşıdır. Hazırki nəticəyə əsasən, azarkeşlər 23 fərqli ölkəni təmsil edir. İlk üçlükdə Böyük Britaniya, Azərbaycan və Türkiyə yer alır.
İndidən bilet əldə etmək istəyən azarkeşlər yanvarın 15-dək davam edəcək 20 faizlik erkən satış endirimindən yararlana biləcəklər. Ənənəvi “early bird” kampaniyası dövründə ayaqüstü biletlər 40 manatdan 120 manatadək, tribuna biletləri 160 manatdan 690 manatadək, azyaşlılar üçün 110 manatdan 480 manatadək dəyişir.
Biletləri BȘH-nin rəsmi veb səhifəsindən (www.bakucitycircuit.com) və ya "28 Mall", "Gənclik Mall", Heydər Əliyev Sarayı, Kiosk 1 (Azərbaycan kinoteatrı), Kiosk 2 (Nizami küçəsi), ASAN 1, ASAN 2, ASAN 3, ASAN 4 və ASAN Sumqayıt yerli satış məntəqələrindən əldə etmək mümkündür.
Azərbaycan Qran-prisi gələn il 28-30 aprel tarixlərində təşkil olunacaq.
