"İstərdik ki, final mərhələsinə birbaşa vəsiqə qazanaq"
"Bakıda daha yaxşı oynadıq bu rəqibə qarşı və sübut etdik ki, istənilən milli ilə mübarizə aparacaq gücdəyik".
Mediasport.az xəbər verir ki, bu sözləri futzal yığmamızın qapıçısı Emin Kürdov deyib.
Təcrübəli qolkiper DÇ-2024-ün elit-raundu çərçivəsində Astanada Qazaxıstan məğlubiyyətindən sonra federasiyanın rəsmi saytına açıqlama verib.
Kürdov deyib ki, Astanadakı oyun Bakıdakı matçın davamı oldu: "Bu görüşlər sanki bir-birini təkrarladı. Sadəcə bəxtimiz gətirmədi. İdmanda bəxt amili çox vacibdir. Hər iki görüşdə bəxt onların tərəfində oldu. Zalda da onlar üçün yaxşı atmosfer yaradılmışdı. Hakimlər də öz “sözünü” dedilər. Əsas da Bakıdakı matçı qeyd edərdim. Hesab 1:2 olanda fitlə oyunu saxladılar, ancaq rəqibin topu oğurlayıb qol vurmasına göz yumdular. Bunun müqabilində rəqibdən fair-pley nümunəsi gözləyirdik, təəssüf ki, etmədilər.
Qarşıda 2 oyunumuz qalıb. Bakıda Rumıniyanı, səfərdə isə Niderlandı mütləq məğlub etməliyik ki, seçmə mərhələni ikinci pillədə başa vuraq. Düzdür, itkimiz olacaq. Edu bu dəfə cəzalı duruma düşdü, Rumıniyaya qarşı oyunu buraxacaq. Əvəzində Felipinyo komandanın yanında olacaq. Əlbəttə, istərdik ki, final mərhələsinə birbaşa vəsiqə qazanaq. Amma qeyd etdiyim səbəblər də buna imkan vermədi”.
Qeyd edək ki, komandamız Qazaxıstana 2:3 hesabı ilə uduzub.
