"Qarabağ" rəsmisinə Avropa Klublar Birliyinin şurasında vəzifə verildi
!["Qarabağ" rəsmisinə Avropa Klublar Birliyinin şurasında vəzifə verildi](https://mediasport.az/uploads/images/202309/image_750x_64f98f9253984.jpg)
"Qarabağ" klubunun baş meneceri Asif Əsgərov Avropa Klublar Birliyinin (ECA) İcraiyyə Şurasına üzv seçilib.
Mediasport.az xəbər verir bu barədə ECA-nın "X" sosial şəbəkə hesabında bildirilib.
Seçki qurumun Almaniyanın paytaxtı Berlində təşkil olunan Assambleyasında baş tutub. Əsgərov bunadək 2017-ci ildən işçi qrupunun üzvü, 2019-cu ildən isə katibi olub.
O, beynəlxalq futbol qurumlarının rəhbərliyində və qərarverici orqanında təmsil olunan ilk azərbaycanlıdır. 2008-ci ildə yaradılmış ECA UEFA tərəfindən tanınan yeganə klub təşkilatıdır.
Qurum qitədə klubların maraqlarını müdafiə edir, millilərin oyun təqvimindən avrokuboklaradək bir çox önəmli məsələlərdə UEFA ECA-nın tövsiyələrini nəzərə almaqla fəaliyyətini qurur.
ECA-nın hazırki rəhbəri PSJ-nin sahibi Nasir Əl-Xəlaifidir. İcraiyyə Komitəsinə üzv seçilənlər arasında əfsanəvi portuqaliyalı Ruy Koşta, türk iş adamı Ali Koç və digər tanınmış simalar var.
Berlindəki Baş Assambleyada ölkəmizi 1 əsas və 3 assosiativ üzv təmsil edir. Bunlar Asif Əsgərovdan başqa "Neftçi", "Qəbələ" və "Sumqayıt" klublarından Fərrux Mahmudov, Nail Kərimov və Riad Rəfiyevdir.