AFFA ermənilərin dünənki dron təxribatı ilə bağlı bəyanat yayıb
AFFA Ermənistan və Xorvatiya yığmaları arasında keçirilmiş AÇ-2024-ün seçmə mərhələsinin oyununda (0:1) baş verən hadisə ilə bağlı bəyanat yayıb:
“Azərbaycan Futbol Federasiyaları Assosiasiyası bildirir ki, 11 sentyabr 2023-cü il tarixində AVRO-2024-ün seçmə mərhələsi çərçivəsində baş tutmuş Ermənistan – Xorvatiya oyununun 35-ci dəqiqəsində dron vasitəsilə qondarma rejimin “bayrağ”ının stadionun oyun keçirilən ərazisində nümayiş etdirilməsi böyük şiddətlə qınanılır və Ermənistan Futbol Federasiyasından bu cür əməllərin qarşısını almaq, o cümlədən Azərbaycan Respublikasının suverenliyinə və ərazi bütövlüyünə ləkə atan digər əməlləri önləmək, öz azarkeşlərini bu əməllərdən çəkindirmək məqsədi ilə tədbirlər görməsi tələb olunur.
Həmçinin bildiririk ki, ilk dəfə deyildir ki, sözügedən əməllər törədilir. Biz AFFA olaraq futboldan siyasi alət kimi istifadə olunmasına yönələn bütün növ hərəkətlərə qarşı UEFA və digər üst qurumlar qarşısında öz şikayətlərimizi bildiririk və bildirəcəyik. Sözügedən məsələ ilə bağlı UEFA-ya müraciət edərək qurumun ədalətli şəkildə qərar qəbul edəcəyinə ümid edirik.
Bir daha qeyd edirik ki, idman oyunları siyasi əməllərə alət edilməməlidir”.
