Azərbaycan güləşçisi Yay Olimpiya Oyunlarına qələbə ilə başladı
Fransanın paytaxtı Parisdə keçirilən XXXIII Yay Olimpiya Oyunlarında güləş yarışları start götürüb.
Mediasport.az xəbər verir ki, ilk gündə Azərbaycanın 2 pəhləvanı mübarizəyə qoşulacaq.
Yunan-Roma güləşçilərimizdən ilk olaraq Sabah Şəriəti yarışıb. 130 kq çəki dərəcəsində mübarizə aparan idmançımız 1/8 finalda estoniyalı Heyki Nabi ilə üz-üzə gəlib.
Sabah 1:1 hesabı ilə başa çatan dueldə sonuncu xal prinsipi ilə qalib gələrək adını 1/4 finala yazdırıb.
Bir qədər sonra 60 kq-da Murad Məmmədov 1/8 finalda venesuelalı Rayber Rodriges Orosko ilə qarşılaşacaq.
Azərbaycan güləşçilərinin bütün görüşləri İTV kanalında canlı yayımlanacaq. Ölkəmiz Fransada 11 güləşçi ilə təmsil olunacaq. Onlardan 5-i yunan-Roma, 6-sı sərbəst güləşçilərdir.
Yunan-Roma güləşi: Murad Məmmədov (60 kq), Həsrət Cəfərov (67 kq), Sənan Süleymanov (77 kq), Rafiq Hüseynov (87 kq), Sabah Şəriəti (130 kq);
Sərbəst güləş: Əliabbas Rzazadə (57 kq), Hacı Əliyev (65 kq), Turan Bayramov (74 kq), Osman Nurmaqomedov (86 kq), Maqomedxan Maqomedov (97 kq), Giorgi Meşvildişvili (125 kq).
Xatırladaq ki, Azərbaycan olimpiadada indiyədək 3 medalı təmin edib. Cüdoçular Hidayət Heydərov (73 kq) və Zelim Kotsoyev (100 kq) çempion olublar.
Boksçu Alfonso Dominges isə finala çıxdığı üçün minimum 2-ci yeri tutacaq.
