Dünya Güləş Birliyi qalmaqallı görüş barədə qərar verdi - RƏSMİ
Dünya Güləş Birliyinin (UWW) İntizam Komitəsi Bakıda keçirilən güləş üzrə Avropa Olimpiya Təsnifat Turnirində Turan Bayramovla Frank Çamizo (İtaliya) arasında keçirilmiş görüşlə bağlı qərarını açıqlayıb.
Mediasport.az xəbər verir ki, 74 kq-da mübarizə aparan yığmamızın sərbəst güləşçisinin yarımfinal görüşündəki qələbəsi bir daha təsdiqlənib.
Qərarda Beynəlxalq Güləş Qaydalarının 53-cü maddəsinə görə, xalçada qalib elan edildikdən sonra heç bir halda nəticənin dəyişmədiyi bildirilib. Bununla yanaşı, UWW-dən İstanbulda mayın 9-da start götürəcək Dünya Olimpiya Təsnifat Turnirində Çamizonun çəki dərəcəsində 1-ci olması xahiş edilib.
İntizam Komitəsi görüşün hakimlərinə müxtəlif cəzalar verib. Xalça hakimi Roman Pavlov və hakim İbrahim Cicioğlu ilin sonunadək bütün yarışlardan uzaqlaşdırılıb.
Görüşə təyin olunan digər ədalət təmsilçiləri Ali Sayvan oktyabrın 30-dək, Aleksey Bazulin, Kamil Buəziz və Kase Qossel isə iyunun 30-dək diskvalifikasiya olunublar.
Görüşü 2 - müstəqil və ayrı komissiya araşdırıb. Onlar şəffaf şəkildə hakimlərin işini və görüşün analizini aparıblar. Hər komissiya 3 nəfərdən, müvafiq olaraq hakimlər komissiyasının sədri, hakimlik və beynəlxalq güləş qaydaları üzrə təcrübəsi olan 2 ekspert, 3 büro üzvündən ibarət olub.
Qeyd edək ki, Bayramov 8:8 hesabı ilə başa çatan dueldə xalların keyfiyyətinə görə qələbə ilə "Paris-2024"ə lisenziya qazanıb.
İtaliyalı güləşçinin sonda yerinə yetirdiyi fənd vaxt başa çatdığı üçün qeydə alınmasa da, apenninlilər həlledici xalın 6 dəqiqəlik qarşılaşma daxilində gerçəkləşdiyini iddia etmişdilər.
Həmçinin, Çamizo İtaliya mətbuatına verdiyi açıqlamada ona görüşdən qabaq uduzması üçün 300 min dollar rüşvət təklif edildiyinə dair iddia səsləndirib.
