"Avstriyaya çox şans verməməyə çalışacağıq" - Emin Mahmudov
"Bizi güclü komandaya qarşı oyun gözləyir. Buna baxmayaraq, meydana qələbə üçün çıxacağıq”.
Mediasport.az xəbər verir ki, bu sözləri Azərbaycan yığma komandasının kapitanı Emin Mahmudov deyib.
Təcrübəli yarımmüdafiəçi AVRO-2024-ün seçmə qrup mərhələsi çərçivəsində bu gün Bakıda qəbul edəcəkləri Avstriya millisi ilə matçöncəsi düşüncələrini bölüşüb.
31 yaşlı futbolçu onları çətin oyunun gözlədiyini bildirib: “Sürətli və intensiv futbol oynayırlar. Biz də yaxşı nəticənin davamını gətirmək istəyirik. Meydanda çox sıx oynamaqla bir-birimizə yaxın olmalıyıq. Onlar yaxşı top saxlayırlar. Xüsusən ara ötürmələrində effektli olurlar. Müdafiədə top itirməməliyik. Səfərdə 1:4 hesabı ilə uduzanda topu bizdən alıb hücuma qoşulurdular. Avstriyaya çox şans verməməyə çalışacağıq”.
Tofiq Bəhramov adına Respublika stadionunda keçiriləcək Azərbaycan – Avstriya oyunu saat 20:00-da başlanacaq.
