Azərbaycan Kubokunda 29-cu final və ya 3299 gündən sonra ikinci duel
![Azərbaycan Kubokunda 29-cu final və ya 3299 gündən sonra ikinci duel](https://mediasport.az/uploads/images/202212/image_750x_63921d7d4b906.jpg)
“Neftçi” və “Qəbələ” tarixində ikinci dəfə Azərbaycan Kubokunun finalında qarşılaşacaq.
mediasport.az xəbər verir ki, bu komandaların 3299 gündən sonra həlledici qarşılaşmada ikinci dueli olacaq.
Buna qədər birinci və sonuncu dəfə tərəflər 2013/2014-cü illər mövsümünün finalında üz-üzə gəliblər. 9 il əvvəlki matçda 1:1 hesabı qeydə alınıb və penaltilər seriyasında “Qəbələ” 3:2 hesablı qələbə ilə kuboka sahib çıxıb.
Kubok tarixində indiyə qədər 28 final oynanılıb. Həmin görüşlərdə 7 fərqli hesab qeydə alınıb.
Əlavə vaxtın da keçirildiyi qarşılaşmalardakı 120 dəqiqəlik mübarizəni də nəzərə alsaq, ən çox 1:0 hesabı olub. 9 final oyununda cəmi 1 top vurulub. Eyni zamanda finallarda 2:1 (7 dəfə), 2:0 (5), 1:1 (3), 0:0 (2), 3:1 (1) və 3:0 (1) hesablarına da rast gəlinib.
Ümumilikdə 12 görüşdə əlavə vaxt oynanılıb. Bunun 7-də artırılmış 30 dəqiqədə qalibi müəyyənləşdirmək mümkün olub, 5 halda isə qalib penaltilər seriyasından sonra məlum olub.
Sabah “Bakcell Arena”da keçiriləcək 31-ci Azərbaycan Kubokunun final oyunu saat 20:00-da start götürəcək.