"Uşaqlara başa salmışam ki, biz Azərbaycan üçün oynayırıq"
19 yaşadək futzalçılardan ibarət Azərbaycan millisi Belarusun paytaxtı Minskdə təşkil olunacaq II Müstəqil Dövlətlər Birliyi (MDB) oyunlarında iştirak üçün səfərə yollanıb.
mediasport.az xəbər verir ki, komandamızın hazırlıq durumu ilə bağlı baş məşqçi İlqar Aslanov federasiyanın rəsmi saytına müsahibə verib.
Mütəxəssis komandada əhval-ruhiyyənin yüksək səviyyədə olduğunu deyib:
"Turnirə normal hazırlaşmışıq. Təlim-məşq toplanışı keçirməsək də, gündəlik məşqlərlə bu boşluğu kompensasiya etməyə çalışdıq. Heyətimizin əksər üzvü mart ayında U-19-ların Avropa çempionatının əsas mərhələsində, eləcə də Yüksək Liqada iştirak edən futzalçılardır.
Rəqiblərə gəldikdə, əlbəttə, Rusiya və Belarus turnirin favoritləri hesab olunur. Ancaq Özbəkistan yığması da son illərdə inkişafdadır və demək olar, iddialılardandır. Qırğızıstanın oyunu haqda, hələ ki, məlumata sahib deyiləm, ancaq onlar bizdən sonra oynayacaqlar, ona görə də canlı izləyib, bilgi əldə edəcəm. Təbii ki, rəqiblərimiz fərqlənsələr də, biz də əlimizdən gələnin ən yaxşısını edəcəyik ki, uğur qazanaq. Uşaqlara başa salmışam ki, biz Azərbaycan üçün oynayırıq. Ona görə sona qədər “vuruşmalıyıq”. Bu cür turnirlər həm də gənc futzalçıların təcrübə toplaması, beynəlxalq oyun praktikası qazanması baxımından vacibdir”.
Qeyd edək ki, MDB Oyunlarında millimiz Belarus, Rusiya, Qırğızıstan və Özbəkistan yığmaları ilə eyni qrupda yarışacaq. İlk matçımız avqustun 7-də meydan sahiblərinə qarşı olacaq.
