"Biraz diqqətli və aktiv olsaydıq, növbəti qolu da vura bilərdik"
"Tura Tovuz" Premyer Liqanın 16-cı turunu məğlubiyyətlə başa vurdu.
mediasport.az xəbər verir ki, bölgə təmsilçisi Zirə səfərinə xal dalınca yollansa da, meydanı məğlub tərk etdi - 1:2.
Tovuz klubunun baş məşqçisi Ayxan Abbasov keçmiş klubuna qarşı oyundan sonra fikirlərini bölüşüb:
- Maraqlı və mübarizəli oyun oldu. Hesabdan asılı olmayaraq, futbolçularım sona qədər mübarizə apardılar. Təəssüf ki, standart vəziyyətdən qol buraxdıq. Rəqibin üstünlüyü standart vəziyyətlər idi. Zədə səbəbindən bəzi futbolçuların olmaması müdafiədə boy fərqində rəqibdən geri qalmağımıza səbəb oldu. Bundan da istifadə etdilər. Qol buraxdıqdan sonra hücuma qoşulduq. Rəqibin əks-hücumda, xüsusilə də Keytanın aktiv olduğunu bilirdik. Qolumuzu da vurduq. Biraz diqqətli və aktiv olsaydıq, növbəti qolu da vura bilərdik. Qarşıdan çətin oyun gəlir. Çalışacağıq ki, zədəlilərimiz də sıraya qayıtsın, bizə kömək etsinlər. Çünki belə sıx qrafikdə zədəlilərin çox olması bizə mane olur. Azarkeşlərimizə təşəkkür edirəm, yenə bizi yalnız buraxmadılar. 500 kilometr yol qət edib bizi dəstəklədilər. Udsaq da, uduzsaq da, daim bizi dəstəkləyirlər.
